Rom 4 | KNVFLY_RIVER | STEP | Ebema꞉ modobola la꞉ Yua꞉piate a Yu epono ewono A꞉ibalayamakono tanalo nemalagidilala꞉. Ebeno nanitabokobi midi tanaloma꞉ Godote beda꞉ kawo tanalonomo kiyatumiyale?

a 4:3W Mabu 15:6; Gal 3:6

b 4:7-8Oale 32:1-2

c 4:10-11W Mabu 17:10-11

d 4:13W Mabu 17:4-6; 22:17-18; Gal 3:29

e 4:14 Gal 3:18

f 4:15-16 Lom 3:20; 5:13; Gal 3:7

g 4:17W Mabu 17:5

h 4:18W Mabu 15:5

i 4:19W Mabu 17:17

j 4:22W Mabu 15:6

k 4:25Ais 53:4-5

Romans 4

Godote Yu Epono Ewono A꞉ibalayamakono Nanitabokobi Midi Tanalodo Ebe Tuputupudawama꞉ Da꞉midiya

1 Ebema꞉ modobola la꞉ Yua꞉piate a Yu epono ewono A꞉ibalayamakono tanalo nemalagidilala꞉. Ebeno nanitabokobi midi tanaloma꞉ Godote beda꞉ kawo tanalonomo kiyatumiyale? 2 Numa꞉la꞉, A꞉ibalayamate kebe wadewade tanalo kosiyodilolenamile, Godote ebe osiyodilole tanalodo ebe tuputupudawama꞉ na꞉midiyataleka꞉, ebe a꞉ka꞉tuwa꞉ ebe bowalogiyana꞉. Wiyasiya Godokono umi magumulo A꞉ibalayamate ebeno wadewade osiyodilole mabuma꞉ ebe a꞉ka꞉tuwa꞉ ebe walogonama꞉ modoboa꞉, 3 ebema꞉ ebeno Bukalo tabote ma kunu itana, “Godote A꞉ibalayamakono nanitabokobi midi tanalo umite ebe tuputupudawama꞉ ebo ka꞉miya.” ^a

4 Numa꞉la꞉, kebe dubute mani woko dosiyodilona, ebete woko watodawagodone wiya delaemene, ebe wiya lawe tanalo ebe watodawano gito ikame tanaloa꞉. Ao, ebe dubute woko osiyodilo magumulo ebeno elawamo modobo wiya elawe, lumagi idino nilakapo tanalodoa꞉. 5 Wiyasiya kebe dubute Godoko nanitabokobi da꞉midina, ebeno tanalo iyanomola mabu ebete ebeno woko osiyodilo elawamo wade wiya laema꞉ kegena꞉. Ao, ebete Godokono woko osiyodilo elawo kapiya nanitabokobi eba midinalo, Godote ebe tuputupudawama꞉ ka꞉milo wade wiya ebo kikaemene, mabu nanitabola, ebe Kawodawa iyatawanomola piyate ebetamo tudila꞉oa꞉pima꞉ deda꞉ona, ebete ebe epo ibino tudila꞉oa꞉ tanalo magumune wagailite ibi tuputupupima꞉ ka꞉midilima꞉. 6 Ebema꞉ kebe lumagite wadewade tanalo osiyodilolea꞉ tetelo Godote ebe lawete tuputupudawama꞉ gito deka꞉imene, ebete Godokono walubi tanaloma꞉ kawo kalakalanomo kelaemene. Da꞉ibidite ebe tanalo eba malagidilolo Godokono Bukamo tabo ma kunu akuloliya,

7 “Godote kebe epono kuba osiyodilole tanalo nilakapolo da꞉dodolomatililaemene,
ibino kalakala beda꞉ kawonomola꞉ka꞉,
mabu Godote ibino kuba gito egebolelame! ^b
8 Iyo, Kawodawate pokono kuba osiyodilole tanalo walo malagidilolemea꞉noma꞉ degemene,
ebeno kalakalate kawonomoma꞉ keda꞉mene.”

A꞉ibalayamate Tama Itamida Pukala Lawea꞉no Dopamo Godote Ebe Tuputupudawama꞉ Deka꞉miya

9 La꞉imano woki keba kunula꞉ka꞉? Godokono osiyodilo magumulo demaigana, ebe kalakala tanalo ebe piyateka꞉ baibai gudino tama itamida pukala delawiya ibi kapiyatamo kitanale? O ebe kalakalate tama itamida pukala lawea꞉piatamo atumu ba꞉kitanale? Numa꞉la꞉, a iyalo egelama꞉ ma kunu, Godote A꞉ibalayamakono nanitabokobi midi tanalo uimite ebe tuputupudawama꞉ ebo ka꞉miya. 10 Ebema꞉ me tuputupudawama꞉ ka꞉mi tanalote A꞉ibalayamatamo kebako tetelo kemaigiyale, ebe tama itamida pukala lawea꞉ tetelola꞉ka꞉, o ebete pukala delawiya walogabo apunela꞉ka꞉? Iyo, ebete pukala lawea꞉ tetelo Godote ebeno nanitabokobi midi tanalodo ebe tuputupudawama꞉ ka꞉mite, walogabo apune ebeno tuputupudawama꞉ eda꞉ tanalo awokalima꞉, ebete Godokono tabamo tuduwatate tama itamida pukala ebo lawiya. Ebema꞉ piyate tama itamida pukala lawea꞉ tetelo Godote ibino nanitabokobi midi tanalodo ibi tuputupupima꞉ deka꞉la꞉mina, A꞉ibalayamako ebe Yua꞉pi bilibilinomono ewono nabiwila. ^c 12 Ega꞉walo me opolo a piyate tama itamida pukala iyalo delawiyama꞉, a Yu epo magumulo piyate nanitabokobi midi gabodo dowapata꞉lamena, ibi atumu A꞉ibalayamakono walone gudinomola. Ebema꞉ naimano Yu epo namutupiala꞉, aimano ewono nabiwi A꞉ibalayamate tama itamida pukala lawea꞉ tetelo nanitabokobi midi magumulo keba kunu kepata꞉namile, modobola ale uwomua꞉ tetelo eba kunu atumu ba꞉kowapata꞉lamenama꞉.

Godote Epatamo Wadewade Tanalo Ikalaema꞉ Nanitabolo Degiya, ‘N’Iba꞉te Nanitabokobi Midi Tanalodo Kuwatema꞉na꞉

13 Ebene iyalo tetenomolo Godote A꞉ibalayamako ega꞉walo ebeno walone gudi nanitabolo ma kunu analiya, me opo kawonomo ibinoma꞉ beda꞉namene. Mabu keleka꞉ ebete ma kunu degiya? A꞉ibalayamate ebeno Totomu Tabamo da꞉tuduwatanami ebe mabuma꞉la꞉ka꞉? Ao, ebete A꞉ibalayamakono nanitabokobi midi tanalodo ebe tuputupudawama꞉ deka꞉miya, ebe mabuma꞉ ebe ega꞉walo ebeno walone gudi kowalubilinama꞉ ebe tabo iyatiya. ^d 14 Numa꞉la꞉, Godote epatamo ikalaema꞉ nanitabolo degiya, iba꞉te ebeno Totomu Tabamo eba tudila꞉onalo ebe wadewade tanalo ibi a꞉ka꞉tuwa꞉ ibino elawamo duwatema꞉na꞉, ebe tetelo iba꞉te kegelama꞉na꞉ nanitabokobi midi tanalo kawo tanaloa꞉, iyo, iba꞉te daedale woki ma kunu kemalagidiloma꞉na꞉, aimano elawo modobola wiyasiya Godote a walubima꞉ dopamo degiya ebe tabono elawote nanitabolo kitana꞉. ^e 15 Wiyasiya nanitabola, Godokono Totomu Tabono tanalodo iba꞉te ebegodone wadewade tanalo a꞉kuwatema꞉na꞉, kapiya tanalonomo kelaema꞉na꞉, ebe tanalo ebe ibino kuba osiyodilole wiya lawe tanalola.

Ebe mabuma꞉ Godote ebeno Totomu Tabo iyabaiamo eba alomolo gabo idi osiyodiliya epate ebeno wadewade tanalo kuwatema꞉, mabu Totomu Tabo pola꞉na꞉ tetelo epono tudila꞉oa꞉ tanaloma꞉ kuba wiya lawe tanalote a꞉kitanamene. Numa꞉la꞉, Godote atamo dosiyodiliya, ebe gabo ebe nanitabokobi midi gabola, iyo, ebe nilakapo gabodo a A꞉ibalayamakono walone gudi bilibilinomate Godogodone wadewade tanalo buwatenakoma꞉. Ebema꞉ nanitabola, piyate A꞉ibalayamako eba waloma꞉tanalo nanitabokobi midi tanalodo Godokono Totomu Tabamo da꞉tudila꞉ona, A꞉ibalayamako ebe epo bilibilinomono ewono nabiwila. ^f 17 Iyo, Godote ebeno Bukalo A꞉ibalayamatamo ma kunu giya, “Nale a꞉ma꞉ epono taneba bilibilinomono ewonoma꞉ a꞉midimata,” ebema꞉ A꞉ibalayamate poko nanitabokobi da꞉midinami, ebe Kawodawano umi magumulo ebe a nanitabokobi midipino ewono nabiwima꞉ eda꞉na.

Numa꞉la꞉, ebe Kawodawa Godoko kapiyagodolo elawo bitana a꞉elao epo igilamo kowadipalatelema꞉, iyo, ebe kapiya modobola ebeno ubilo iyaiya tanalo bilibilinomo ebeno tabo kapiyanomamo osiyodilolema꞉, inamabu ida꞉moa꞉. ^g 18 Ebema꞉ Godote A꞉ibalayamatamo ikaema꞉ degiya, ebete ebe gudu laema꞉ gabo umia꞉no wiyasiya Godoko nanitabokobi ebo midiya. Iyo, ebete nanitabo tanalo laema꞉ tete geyageyalo olowiolo dokolinami, ebe gabodo ebe epo taneba bilibilinomono ewonoma꞉ ediya, mabu Godote ebetamo dopamo nanitabolo egiya, “A꞉imano walonepiate bilibilinomoma꞉ keda꞉oma꞉na꞉.” ^h 19 Ebene A꞉ibalayamate 100 ulama tetema꞉ eba eda꞉nalo, ebeno ape dumiya ebe tatalila a꞉e, wiyasiya ebete ebe tanalo ega꞉walo Selakono gudia꞉noma꞉ eda꞉ tanaloma꞉ woki bilibilima꞉ eda꞉no nanitabokobi midi magumulo kodakodalo utinami. ⁱ 20 Iyo, Godote ebetamo ikaema꞉ nanitabolo degiya, ebete ebe tanalo nanitabokobi midi gabone kelegatepanakia꞉, ebema꞉ ebete nanitabo tanalo lawea꞉no ebeno tepo magumuno woki eba kodakodaiminalo Godoko ebo moinaki. 21 Ebete ebeno tepo magumulo iyatawanomo niyatawanami, Godote kebe tanalo osiyodiloma꞉ nanitabolo degiya ebegodolo elawo bitana ebe tanalo kosiyodiloma꞉. 22 Iyo, me mabuma꞉ Godote A꞉ibalayamakono nanitabokobi midi tanalodo ebe tuputupudawama꞉ ebema꞉ ka꞉miya. ^j

23 Wiyasiya kawo tanalo idi ma kunula. A꞉ibalayamakono tuputupudawama꞉ eda꞉ tanalo Godokono Bukalo ditana, ebe tabote ebe kapiyano tanaloma꞉ kegena꞉, 24 ao, ebe tabote aimano tanaloma꞉ atumu na꞉kegena, mabu kebe dawate aimano Kawodawa Ya꞉suko a꞉e magumune dadipatiya, a piyate ebe nanitabokobi da꞉midinama꞉ ebete ebe tanalodo a atumu ebeno tuputupupima꞉ keka꞉mina. 25 Ebema꞉ kalakala kawonomola, mabu Godote aimano kuba osiyodilole tanaloma꞉ Ya꞉suko ebe anakapumipiatamo ikalamiya, wiyasiya ebete da꞉iya Godote ebe a꞉e magumune walo akadipatiya, ebete ebe gabodo a ebeno tuputupupima꞉ keka꞉a꞉minama꞉. ^k